Letër nga Presidenti
Të nderuar kolegë, anëtarë dhe miq të Shoqatës “Rrjeti Shqiptar i Frakturave nga Fraxhiliteti,”
Në emër të Shoqatës sonë dhe të Këshillit Drejtues, ju përshëndesim dhe ju mirëpresim në faqen e internetit të kësaj Shoqate, e njohur shkurt si FFN-Al. Kjo Shoqatë, e formuar në vitin 2021 nga mjekë të specialiteteve të ndryshme dhe si Organizatë Jo Fitimprurëse (OJF), funksionon në bashkëpunim me Rrjetin Global të Frakturave nga Fraxhiliteti (Fragility Fracture Network Global – https://www.fragilityfracturenetwork.org).
Qëllimi i Shoqatës sonë është rritja e kujdesit në të gjitha hallkat e parandalimit dhe trajtimit të frakturave nga fraxhiliteti, veçanërisht tek të moshuarit, por jo vetëm. Me një target primar përkujdesjen ndaj pacientit, kjo metodikë, e bazuar në një qasje bashkëpunimi multidisiplinar dhe mjekësi të bazuar në evidenca, synon të çojë cilësinë e shërbimit në një nivel tjetër.
Bazuar në kolonat e filozofisë së FFN Global, Shoqata jonë është e gatshme të bashkëpunojë për të përmirësuar qasjen dhe kujdesin ndaj pacientëve në drejtimet si më poshtë:
- Përmirësimi i kujdesit gjatë episodit akut të frakturave nga fraxhiliteti.
- Rehabilitimi bashkëkohor i pacientëve menjëherë pas trajtimit të frakturave.
- Parandalimi sekondar i tyre.
Po punohet që kjo filozofi të implementohet në praktikën e përditshme nëpërmjet:
- Trajnimeve të stafit mjekësor.
- Kërkimeve dhe publikimeve mjekësore.
- Bashkëpunimit me organizmat përkatës, duke filluar nga Ministria e Shëndetësisë e deri tek të gjitha shoqatat që përfshihen në këtë filozofi pune.
Trajtimi adekuat i këtyre frakturave ka për qëllim jo vetëm përmirësimin e cilësisë së jetës së pacientëve tanë, por edhe uljen e kostove të trajtimit, duke pasur kështu një impakt pozitiv në shoqërinë tonë.
Me respekt,
Artan Bano MD
Kirurg Ortoped
Spitali Universitar i Traumes
President i Shoqates FFN Al